आ राजस्थानी भासा हैँ

आ राजस्थानी भासा हैँ

सक्तिदान कविया
इणरो इतिहास अनूठो है , इण मांय मुलक री आसा है ।
चहुं कूंटां चावी नै ठावी , आ राजस्थानी भासा हैँ ।।

1 .
जद ही भारत मेँ सताजोग , आफत री आंधी आई ही ।
बगतर री कङियां बङकी ही , जद सिँधू राग सुणाई ही ।
गङगङिया तोपा रा गोळा , भाला री अणियां भळकी ही ।
जोधां रा धारा जुङता ही खालां रातम्बर खलकी ही ।
रङबङता माथा रणखेतां , अङवङता घोङा ऊललता ।
सिर कटियां सूरा समहर मेँ ढालां तरवारा लै ढलता ।
रण बंका भिङ आरांण रचै , तिङ पैखे भांण तमासा है ।
उण बखत हुवै ललकार उठै , वा राजस्थानी भासा है ।।
2.
इणमेँ सतियां रा सिलालेख , इणमेँ संतां री वाणी है ।
इणमेँ पाबु रा परवाङा , इण मेँ रजवट रो पांणी हैँ ।
इणमेँ जांभै री जुगत जोय , पीपै री दया प्रकासी हैँ ।
दीठो समदर सी रामदेव , दादू सत नाम उपासी हैँ ।
इणमेँ मे तेजै रा वचन तौर , इणमेँ हमीर रो हठ पेखो ।
आवङ करणी मालण दे रा , इणमेँ परचा परगट देखो ।
जद तांई संत सूरमा अर , साहित्यकारां री सांसा है ।
करसां रै हिवङै री किलोळ , आ राजस्थानी भासा है ।।
3.
करमां री इण बोली मेँ ही , भगवान खीचङो खायो है ।
मीरा मेङतणी इण मेँ ही गिरधर गौपाल रिझायो है ।
इण मेँ पिब सूं मांण हेत , राणी ऊमा दे रूठी ही ।
पदमणियां इणमेँ पाठ पढयो , जद जौहर ज्वाला ऊठी ही ।
इणमेँ हाङी ललकार करी , जद आंतङियां परनाळी ही ।
मुरधर री बागडोर इण मेँ ही दुरगादास संभाली ही ।
इणमेँ प्रताप रो प्रण गुंज्यो , जद भेट करी भामासा है ।
सतवादी घणां सपूतां री , आ राजस्थानी भासा हैँ ।।
4.
इणमेँ ही गायो हालरियो , इणमेँ चंडी री चरजावां ।
इणमेँ ऊजमणै गीत गाळ , गुण हरजस परभात्यां गावां ।
इणमेँ आडी ओखांणा , ओलगां भिणत वातां इणमेँ ।
जूनो इतिहास जोवणो व्है , तो अणगिणती ख्यातां इणमेँ ।
इणमेँ ही ईसरदास अलू , भगती रा दीप संजोया हैँ ।
कवि दुरसा बांकीदास करण , सुरजमल मोती पोया है ।
इणमेँ ही पीथल रची वेलि , रचियोङा केइक रासा है ।
डिँगळ गीतां री डकरेलण ,
आ राजस्थानी भासा हैँ ।।
5.
इणमेँ ही हेङाऊ जलाल , नांगोदर लाखो गाईजै ।
सोढो खीँवरो उगेरै जद , चंवरी मेँ धण परणाईजै ।
काछी करियो नै तोडङली राईको रिङमल रागां मेँ ।
हंजतो मोरूङो हाडो नै सूवटियो हरियै बागां मेँ ।
इणमेँ ही जसमां ओङण नै मूमल रो रुप सरावै है ।
कुरजां पणिहारी काछबियो , बरसाळो रस बरसावै है ।
गावै इणमेँ ही गोरबंद , मनहरणा बारैमासा है ।
रागां रीझाळू रंग भीनी , आ राजस्थानी भासा हैँ ।।
6.
इणमेँ ही सपना आया है , इणमेँ ही ओळू आई है ।
इणमेँ ही आयल अरणी नै , झेडर बाळोचण गाई है ।
इणमेँ ही धुंसो बाज्यो है , रण तोरण वंदण रीत हुई ।
इणमेँ ही वाघै भारमली , ढोलै मरवण री प्रीत हुई ।
इणमेँ ही वाजै वायरियो , इणमेँ ही काग करूकै है ।
इणमेँ ही हिचकी आवै है ,
इणमेँ ही आँख फरूकै है ।
इणमे ही जीवण मरण जोय , अंतस रा आसा वासा है ।
मोत्यां सूं मूंघी घणमीठी , आ राजस्थानी भासा हैँ ।।

राजस्थान का भोजन

राजस्थान का भोजन

जै  ना खायो  चूरमा,किया बनसी सूरमा
जै  ना  खायो नुक्ती,किया मिलसी मुक्ति
जै  ना खायो  थूली,दुनिया बीने ही भूली
जै ना खाई लापसी,आत्मा किया धापसी
जै  ना  खायो  सीरो,बण  के  रेग्यो  जीरो
जै ना खायो सोगरो,दास  बणग्यो रोग रो
जै  ना खाई  राबड़ी,सकल  होगी छाबड़ी
जै   ना  खाई  कड्डी,कमजोर होयगी हड्डी
जै ना खायो मिर्ची बडा, विचार  रेवे कड़ा
जै  ना  खायो दाल बाटी, जिंदगी है माटी
जै ना खायो खांकरा, कर्मा में है  कांकरा
जै  ना  खायो पीटलो, है बो सेउं फीटलो
जै ना खाया केर, कोनी बिकी कोई  खैर
जै ना खाई गंवार फली,नसा बिकी गली
जै  ना  खायो  घेवर,ठंडा  पड़ग्या  तेवर
जै ना खाई फीणी, केंकी  जिंदगी जीणी