लो राजस्थान
मारवाङी कविता-
दूध दही ने चाय चाटगी, फूट चाटगी भायाँ ने ।।
इंटरनेट डाक ने चरगी, भैंस्या चरगी गायाँ ने ।।
टेलीफोन मोबाईल चरग्या, नरसां चरगी दायाँ ने ।।
देखो मर्दों फैसन फटको, चरग्यो लोग लुगायाँ ने ।।
साड़ी ने सल्वारां खायगी, धोतीने पतलून खायगी ।।
धर्मशाल ने होटल खायगी, नायाँ ने सैलून खायगी ।।
ऑफिस ने कम्प्यूटर खाग्या, 'मेगी' चावल चून खायगी ॥
राग रागनी फिल्मा खागी, 'सीडी' खागी गाणा ने ॥
टेलीविज़न सबने खाग्यो, गाणे ओर बजाणे ने ॥
गोबर खाद यूरिया खागी, गैस खायगी छाणा ने ॥
पुरसगारा ने बेटर खाग्या, 'चटपटो खाग्यो खाणे ने ॥
चिलम तमाखू ने हुक्को खाग्यो, जरदो खाग्यो बीड़ी ने ॥
बच्या खुच्यां ने पुड़िया खाग्यी, अमल-डोडा खाग्या मुखिया ने ॥
गोरमिंट चोआनी खागी, हाथी खाग्यो कीड़ी ने ॥
राजनीती घर घर ने खागी, नेता चरगया रूपया ने ॥
हिंदी ने अंग्रेजी खागी, भरग्या भ्रष्ट ठिकाणो में ॥
नदी नीर ने कचरो खाग्यो, रेत गई रेठाणे में ॥
धरती ने धिंगान्या खाग्या, पुलिस खायरी थाणे ने ॥
दिल्ली में झाड़ू सी फिरगी, सार नहीं समझाणे में ॥
मंहगाई सगळां ने खागी, देख्या सुण्या नेताओ ने ॥
अहंकार अपणायत खागी, बेटा खाग्या मावां ने ॥
भावुक बन कविताई खागी, 'भावुक' थारा भावां ने ॥
मंगलवार, 27 दिसंबर 2016
भैंस्या चरगी
नाहर जणै न कूकरी
नाहर जणै न कूकरी,शुकरी जणै न शेर।
करीना पीथळ न जणै,तैमूर जणसी फैर।
तैमूर जणसी फैर,अव्वल जणै ओसामा।
नादिर औरंगजेब, अवर'ज हुसैन सदामा।
खिलजी बाबर खास,अकबर जणै जग जाहर।
जिन्नो जणै जरूर,"उदल" आ जणै न नाहर।
बिजली तांई पासा चटकूं।
राजस्थानी ग़ज़ल।
बिजली तांई पासा चटकूं।
खुद नै म्है सावळ ही झटकूं।
मन में रैवे आवण वाळा।
तद खुद री सूरत ही मटकूं।
वारीं यादां में खो जाऊँ।
बादल बण आकासां भटकूं।
जद नी आवै साँझ तणा व्है।
म्है चौखट पासै ही अटकूँ।
दीपा री आसावां पूरै।
यूं आसै पासै ही लटकूं।
दीपा परिहार
शनिवार, 24 दिसंबर 2016
लूणोजी रोहड़िया री वेलि-
लूणोजी रोहड़िया री वेलि-गिरधर दान रतनू दासोड़ी
बीठूजी नै खींवसी सांखला 12 गांव दिया।बीठूजी आपरै नाम सूं बीठनोक बसायो।कालांतर में इणी गांव म़े सिंध रै राठ मुसलमानां सूं सीमाड़ै अर गोधन री रुखाल़ी करतां बीठूजी वीरगति पाई।जिणरो साखीधर उठै एक स्तंभ आज ई मौजूद है।बीठूजी री वंश परंपरा में धरमोजी होया अर धरमोजी रै मेहोजी ।मेहोजी रै सांगटजी/सांगड़जी होया।बीठनोक भाईबंटै में सांगड़जी नै मिलियो जिणरै बदल़ै में तत्कालीन जांगलू नरेश इणां नै सींथल़ इनायत कियो।
सांगड़जी सींथल आयग्या।सांगड़जी रै च्यार बेटा हा-मूल़राजजी,सारंगजी,पीथोजी,अर लूणोजी।एकबार भयंकर काल़ पड़ियो तो च्यारूं भाई आपरी मवेशी लेयर माल़वै गया परा।लारै सूं सूनो गांम देख ऊदावतां सींथल माथै कब्जो कर लियो।मेह होयो।हरियाल़ी होई तो ऐ पाछा आपरै गांम आया।आगे देखै तो ऊदावत धणी बणिया बैठा है!उणां विध विध सूं समझाया पण उणांरै कान जूं ई नीं रेंगी।दूजै भाईयां तो कोई घणो जोर नीं कियो पण लूणैजी सूं आ बात सहन नीं होई।उणां ऊदावतां माथै रीस अणाय आपरै गल़ै इक्कीस बार कटारी खाधी पण घाव एकर ई नीं फाटियो।देखणियां नै अचूंभो होयो अर उणां मानियो कै लूणोजी कटारी नीं खायर खाली राजपूतां नै डरावण रो सांग कर रैया है।घाव नीं फाटण सूं लूणैजी नै ई आपरो अपमान लागियो।बै सीधा देशनोक करनीजी कन्नै आया अर पूरी बात बताय स्वाभिमान कायम राखण रो निवेदन कियो।करनीजी कैयो कै "आज थारै पाखती रै गांम वासी में सांखलां रै अठै ब्याव है सो तूं उठै जा परो।उठै तन्नै बकरी रै दूध री खीर पुरसैला ।उण खीर में बकरी रो बाल़ आवैला बो थारै कंठां में आवतां ई पूरा घाव फाट जावैला।पछै तैं में आपै ई देवत्व प्रगट होवैलो।"
लूणोजी वासी आया।उठै सांखलां घणा कोड किया।जीमण रो बगत होयो जणै जानियां अर मांढियां लूणैजी नै भोजन अरोगण रो कैयो पण लूणैजी मना कर दियो।राजपूतां कैयो" आ तो होय नीं सकै कै म्हे भोजन करां अर म्हांरै घरै चारण भूखो रैवै!धूड़ है म्हांरै ऐड़ै भोजन में।"
लूणैजी कैयो "थांरै घरै शुभ काम है अर म्हारा भोजन करतां ई प्राण नीं रैवै सो थांरै घरै विघन नीं करूं।"सांखलां कैयो कै "आप म्हांरै माथै रा मोड़।आप भूखा रैवो अर म्हे जीमां!तो म्हांनै लख लांणत है।!हिंदू मरै जठै ई हद है!जे ऐड़ी होयगी तो आपरी जथा जुगत करांला!!"लूणैजी देखियो सांखला मानै नी जणै उणां कैयो कै "थे ओ वचन देवो कै अठै म्हारा प्राणांत हो जावै तो म्हनै अठै दाग नीं देयर म्हारै गांम ले जाय ऊदावतां री तिबारी रै दरवाजै माथै दाग देवोला!"
सांखलां कैयो "वचन है !!जै आपरो शरीर नीं रैवैला तो म्हे दाग ऊदावतां री तिबारी रै दरवाजै देवांला।"
लूणैजी ज्यूं ई भोजन कियो।ज्यूं ई इक्कीस घाव फाटग्या।जिगन में विघन पड़ियो पण उण बगत रा मिनख बाप अर बोल नै एक मानता।उणां लूणैजी री अरथी बणाय खांधां उखणी अर सींथल़ आया।लूणैजी नै दिए वचनां मुजब ऊदावतां री तिबारी में अरथी नै उतारी।ऊदावतां ई उजर किय़ो पण सांखलां नै मरण मतै देख हियो हेठो कियो।
उणी दिन कई ऊदावत डरता दिन रा गाडां गोल़ नाठग्या।एक ऊदावत आ कैयर नीं गयो कै लूणो जीवतो ई कीं नीं कर सक्यो तो मरियोड़ो कांई करेला!रात रा उणरो मांचो ऊ़चो उठियो।बो डाडियो कै थारी कवली गाय हूं !मार मती।अबार ई सींथल़ छोड दूंला!लूणैजी उणनै नै छोड दियो बो गयो परो।ओ जिकै गांम में बस्यो ,सींथल़ रा वासी उणनै निनामियो गांम कैवै।नाम नीं लेवै।जिकै ऊदावत दिन रा डरता नाठा बै सोवै गांम में बसिया।
म्हारी घणै दिनां.सूं इच्छा ही कै इण महान जूंझार माथै कीं लिख्यो जावै।आज इच्छा पूरी होई अर पूरै कथानक माथै 31दूहालां रो एक वेलियो गीत लिखियो जिको आपरी पारखी निजरां भेंट कर रैयो हूं---
क्रमशः
गिरधर दान रतनू दासोड़ी
कठै पदमणी पूंगळ री ..
शीश बोरलो..नासा मे नथड़ी..सौगड़ सोनो सेर कठै,
कठै पौमचो मरवण रौ..बोहतर कळियां घेर कठै...!!
कठै पदमणी पूंगळ री ..ढोलो जैसलमैर कठै,
कठै चून्दड़ी जयपुर री ..साफौ सांगानेर कठै.. !!
गिणता गिणता रेखा घिसगी.. पीव मिलन की रीस कठै,
ओठिड़ा सू ठगियौड़़ी ..बी पणिहारी की टीस कठै..!!
विरहण रातां तारा गिणती.. सावण आवण कौल कठै,
सपने में भी साजन दीसे ...सास बहू का बोल कठै..!!
छैल भवंरजी.. ढौला मारू ..कुरजा़ मूमल गीत कठै,
रूड़ा राजस्थान बता.. वा थारी रूड़ी रीत कठै..!!
हरी चून्दड़ी तारा जड़िया ..मरूधर धर की छटा कठै,
धौरां धरती रूप सौवणौ.. काळी कळायण घटा कठै.!!
राखी पूनम रेशम धागे.. भाई बहन को हेत कठै,
मौठ बाज़रा सू लदियौड़ा.. आसौजा का खैत कठै..!!
आधी रात तक होती हथाई ..माघ पौष का शीत कठै,
सुख दुःख में सब साथ रैवता.. बा मिनखा की प्रीत कठै..!!
जन्मया पैला होती सगाई ..बा वचना की परतीत कठै,
गाँव गौरवे गाया बैठी ..दूध दही नौनीत कठै..!!
दादा को करजौ पोतो झैले ..बा मिनखा की नीत कठै,
रूड़ा राजस्थान बता ..वा थारी रूड़ी रीत कठै..!!
काळ पड़िया कौठार खोलता ..बे दानी साहूकार कठै,
सड़का ऊपर लाडू गुड़ता ..गैण्डा की बै हुणकार कठै..!!
पतियां सागै सुरग जावती ..बै सतवन्ती नार कठै,
लखी बणजारो.. टांडौ ढाळै ..बाळद को वैपार कठै..!!
धरा धरम पर आँच आवतां ..मर मिटण री हौड़ कठै,
फैरा सू अधबिच उठिया..बे पाबू राठौड़ कठै..!!
गळियां में गिरधर ने गावै ..बीं मीरा का गीत कठै ,
रूड़ा राजस्थान बता ..वा थारी रूड़ी रीत कठै..!!
बितौड़ा वैभव याद दिरावै.. रणथम्बौर चितौड़ जठै ,
राणा कुम्भा रौ विजय स्तम्भ.. बलि राणा को मौड़ जठै..!!
हल्दीघाटी में घूमर घालै.. चैतक चढ्यौ राण जठै ,
छत्र छँवर छन्गीर झपटियौ.. बौ झालौ मकवाण कठै..!!
राणी पदमणी के सागै ही ..कर सोला सिणगार जठै,
सजधज सतीया सुरग जावती.. मन्त्रा मरण त्यौहार कठै..!!
जयमल पत्ता ..गौरा बादल.. रै खड़का री तान कठै,
बिन माथा धड़ लड़ता रैती.. बा रजपूती शान कठै..!!
तैज केसरिया पिया कसमा ..साका सुरगा प्रीत कठै,
रूड़ा राजस्थान बता ..वा थारी रूड़ी रीत कठै..!!
निरमोही चित्तौड़ बतावै ..तीनों सागा साज कठै,
बौहतर बन्द किवाँड़ बतावै...ढाई साका आज कठै..!!
चित्तौड़ दुर्ग को पेलौ पैहरी ..रावत बागौ बता कठै ,
राजकँवर को बानौ पैरया ..पन्नाधाय को गीगो कठै..!!
बरछी भाला ढाल कटारी.. तोप तमाशा छैल कठै,
ऊंटा लै गढ़ में बड़ता ..चण्डा शक्ता का खैल कठै.!!
जैता गौपा सुजा चूण्डा .?चन्द्रसेन सा वीर कठै,
हड़बू पाबू रामदेव सा ..कळजुग में बै पीर कठै..!!
मेवाड़ में चारभुजा सांवरो सेठ ..श्रीनाथ सो वैभव कठे ,
कठै गयौ बौ दुरगौ बाबौ.. श्याम धरम सू प्रीत कठै..!!
हाथी रौ माथौ छाती झालै.. बै शक्तावत आज कठै,
दौ दौ मौतों मरबा वाळौ.. बल्लू चम्पावत आज कठै..!!
खिलजी ने सबक सिखावण वाळौ ..सोनगिरौ विरमदैव कठै,
हाथी का झटका करवा वाळौ ..कल्लो राई मलौत कठै..!!
अमर कठै ..हमीर कठै ..पृथ्वीराज चौहान कठै,
समदर खाण्डौ धोवण वाळौ.. बौ मर्दानौ मान कठै..!!
मौड़ बन्धियोड़ौ सुरजन जूंझै ..जग जूंझण जूंझार कठै ,
ऊदिया राणा सू हौड़ करणियौ .?बौ टौडर दातार कठै..!!
जयपुर शहर बसावण वाळा.. जयसिंह जी सी रणनीत कठै,
अकबर ने ललकारण वाला ..अमर सीग राठौड कठे,
रूड़ा राजस्थान बता ..वा थारी रूड़ी रीत कठै.. !!
रूडा़ राजस्थान बता ..वा थारी रूड़ी रीत कठै..!!
गुरुवार, 22 दिसंबर 2016
ऐ कदई बैठा आच्छा कोनी लाग
ऐ कदई बैठा आच्छा कोनी लागे
1-कमावण वाळो आदमी।
2-घरे आयड़ो माँगतो।
3-धँधे पर हथाईदार।
4-गाडे बेंवतो बळद।
5-चालतो व्यापार।
6-राखोड़ो नोकर।
7-घणा दिनाँ तक पावणो।
8-नाक माथे माखी।
9-कामआळी बिन्नणी।
10-यात्रा में अण सेंधो मुसाफिर।
11-बिंडी ऊपर कबुतर।
12-चोकी ऊपर कूतियो।
13-घणो जीमतो मीनख।
14-साव गप हाँकणीयो।
15-खुद गो बिरोधी।
बैंक री लेण म
एक भायो आपकी घरआळी नै दिनुग्यां पांच बजे बैंक री लेण म लगाई ! ..
*बाँ दोन्या की आपबीती*
लुगाई:- तपतां -तपतां दो बजे जाता बैंक रै दरूजै म बड़बा को नमर आयो !
तीन बजे जातां कोई कैसियर रै सामी पुगी !
मनै ऊबो राख'र म्हाठो चा पिबा चल्यो गयो !
आधै घण्टै बाद आयो और कम्पुटर पर बैठ'र
बोल्यो " सॉरी मैम पैसे नहीं है ! "
थांकी सौगनज्यो मुण्डो मिरच्यां खायेड़ो सो हुग्यो !
ऐडी स्यूं ले'र चोटी तांई भचीड़ उपड़बा लागग्या सारै दिन
रोई थारै जीव नै और बैरी खाली हाथ टरका दी
मोट्यार:- रीसां बळतो बोल्यो थारैऊं क्यूँ ही कोनी करीज्यो ??? म्हारै पर तो
15 बेलण तोड़ दिया .. बैंक आळै नै कम स्यूं कम गाळ तो काडती
दो च्यार ....
बा भोत ही धिरजाई स्यूं बोली " बेलण तो आज एक ओज्यूं टूटसी !
पिसा बैंक म नहीं .....थारै खातै म कोनी हा मरज्याणा
औऱ भाईजी आज सौळवूं बेलण भी टूटग्यो
धणी रा घोड़
राजस्थान के साहित्यकारों की पुरातन परम्परा रही हैकि उन्होंने सत्य कथन में कभी सत्ता के डर या लोभ लालच की परवाह नही की है। सच्चा कवि नोट बंदी के बाद आमजन को हुई परेशानी और मानसिक पीड़ा को महसूस किए बिना कैसे रह सकता है।
मारवाड़ के प्रख्यात साहित्यकार आदरणीय नवल जी जोशी साहब ने जन मन की संवेदनाओ को बिना किसी भय लोभ पक्षपात के अपनी कलम से उकेरा है।
# ग़ज़ल #
- नवल जोशी
धणी रा घोड़ है जे अड़बड़ै तो अड़बड़ै ब़ीरा
झपाटै पूँछ रै कोई मरै तो छौ मरै ब़ीरा
उजाड़ै सांडिया साबत सजाड़ी साख करसां री
मजूरी मार बरसां री हुकूमत हद छळै ब़ीरा
हुकम नित हालतां बदळै नगाड़ा कूटता हाकम
गतागम में पज्यौ जनगण कठी कर नीसरै ब़ीरा
हता हक रा रुपीड़ा हाथ में सै बैंक भख लीना
भिखारी ज्यूं पसार्यां हाथ लैंणां लड़थड़ै ब़ीरा
लगोलग लूटता जावै खजांना चोर धाड़ैती
अठी खाली पड़्या ठीकर अणूता खड़बड़ै ब़ीरा
सजाड़ी सांवठी धाड़ैतियां री यां जमातां सूं
धणी री छप्पनी छाती अबै क्यूं थरथरै ब़ीरा
अवल जनराज पाखंडा सरासर कूड़ हथकंडा
मिनख रै रोज गळफंदा पड़ै तो छौ पड़ै ब़ीरा
- नवल जोशी
बुधवार, 21 दिसंबर 2016
मरांला!!पण बेटी कीकर देवांला?
मरांला!!पण बेटी कीकर देवांला?
गिरधर दान रतनू दासोड़ी
राजस्थान री आंटीली धरा माथै एक सूं एक बधर सूरमा अर साहसी मिनख जनमिया है।जदै तो कवियां कैयो है -पुरस पटाधर नीपजै,अइयो मुरधर देश! इण सिंह उत्पन्न करण वाल़ी धरा रै नर -नाहरां री अंजसजोग कथावां आज ई अमिट है अर पढियां कै सुणियां आपां नै गौरव री अनुभूति करावै।ऐड़ो ई एक किस्सो है रूण रै शासक सीहड़देव सांखला रो।
विक्रम रै चवदमे सईकै रै पूर्वार्द्ध में रूण माथै सांखलां रो राज।अठै रो शासक सीहड़देव महावीर अर स्वाभिमान रो साक्षात पूतलो ।सीहड़देव रै मेहाजल़ दधवाड़िया पोल़पात।मेहाजल़ घणजोड़ो कवि ,सामधर्मी अर चारणाचार रै गुणां सूं अभिमंडित मिनख।
सीहड़देव रै महारूपवंत कन्या।उणरै शील अर रूप गुणां री चरचा चौताल़ै चावी।
उण बगत दिल्ली माथै अलाऊदीन खिलजी रो शासन।खिलजी रजवट री रणबंकी धरा रै कई सूरमां नै धोखै अर घात सूं हराय धूंसतो थको रूण रै पासैकर निकल़ रैयो हो ,उणी समय उणरै कानां में किणी चुगलखोर सांखली रै रूप अर गुणां री चरचा करी अर कैयो कै आपनै इण राजकुमारी साथै फेरा लेणा चाहीजै।खिलजी ई तेवड़ली कै सीहड़देव री कन्या नै परणीज र हरम री सौभा बधाई जावै।
उण रूण री कांकड़ में डेरा किया अर खबरची मेल र सीहड़देव नै कैवायो कै 'कै तो थारी बेटी रो हाथ म्हारै हाथ में दियो जावै या मोत सूं मुकाबलो करण नै त्यार रैणो चाहीजै!'ज्यूं ई सीहड़देव ,खिलजी रो ओ संदेश सुणियो ज्यूं ई बो आपरै शरीर रै बटक्यां बोड़ण लागग्यो।तन रै झाल़ां उपड़गी ।गात रा गाभा खावण लागग्या।उणनै ठाह हो कै खिलजी कन्नै सेना घणी अर खुद रै कन्नै मुट्ठीक आदमी!!बचकैक आदम्यां सूं अचाणचक खिलजी सूं मुकाबलो करण रो.मतलब आपघात करण जैड़ो है!उण तुरंत आपरै पोल़पात मेहाजी दधवाड़िया नै बुलाया अर इण अणचींती आफत सूं ऊबरण री सलाह पूछी।
मेहाजी कैयो कै 'इणमें पूछण री कांई बात है?धर जावतां ,धरम पलटतां अर त्रिया माथै ताप आयां तो हर कोई मर पूरा देवै पछै आप तो रूण रा धणी हो!-
धर जातां धर्म पलटता,
त्रिया पड़ंतां ताव!
तीन दिहाड़ा मरण रा
कहा रंक कहा राव।।?
आपां ई केशरिया कर र रजपूती री आण कायम राखांला!आप जुद्ध री त्यारी करावो अर म्है दो दिन खिलजी री सेना रोकण री जुगत करूं।' कवि मेहाजल़ रा भाव देवकरणजी ईंदोकली रै आखरां में-
इम सजजै आसेर,
कर तोपां हर कांगरै।
फेरा हुवै न फेर,
बाई रा बीजी बगत।।
दूजा धर दीजैह,
असुभ रंग सह आंतरै।
केसरिया कीजैह,
सजजै मांडो सांखला।।(सीहड़दे चरित)
मेहाजल़ दधवाड़िया सीधा खिलजी रै डेरे पूगिया अर कैवायो कै सीहड़देव रो पोलपात मेहो दधवाडियो पातसाह रै हाजर होणो चावै!
पातसाह ई पोलपात री महत्ता अर राजपूतां रै मन में चारणां री कद्र सूं परिचित हो ।उण मेहाजल़ नै ससम्मान बुलायो अर आवण रो कारण पूछियो।मेहाजल़ कैयो कै 'आपरा समाचार सीहड़देव कन्नै पूगग्या पण ऊभघड़ी इतरी व्यवस्था होवै नीं सो चार दिन ब्याव री त्यारी करण वास्तै चाहीजै।जितै दो दिन आप म्हारै मेहमाण हो।कालै म्हारी बेटी रो ब्याव प्रसिद्ध चारण कवि हूंफाजी सांदू सूं होवैला।आप दो दिन म्हारै अठै रुकर बडजानी री रीत निभावो।'खिलजी हूंफकरण सांदू री प्रज्ञा अर प्रतिभा नै सावजोग जाणतो। तो दूजै कानी मेहा री मेधा ,वाकपटुता, सहजता अर आत्मविश्वास सूं प्रभावित होय दो दिन मेहमाण बणण री हां भरली तो दूजै कानी आ भोल़ावण दीनी कै सीहड़देव री बेटी सूं खिलजी री शादी करावण री जिम्मेदारी मेहाजल़ री है।
मेहाजल़ दो दिन खिलजी री इतरी आवभगत करी कै उण रीझर मेहाजल़ नै 'कूरबै समंद' रो विरद देय सम्मानित कियो।
दो दिनां में सीहड़देव ई आपरै भाईयां,सगै-संबंधियां नै भेल़ा कर लिया अर केसरिया कर र मरणो तेवड़ियो।ज्यूं ई अलाऊदीन नै ठाह लागो कै सांखला ब्याव री नीं मरण री त्यारी कर रैया है अर मेहाजल़ उणनै इणी खातर दो दिन धोखै में राखियो।उणरी रीस रो पार नीं रैयो।उणी बगत रूण माथै हमलो होयो।प्रभात री वेल़ा में राजपूतां मरण रांमत मांडी।हर-हर महादेव रै जोशिलै सुर अर चमकती तीखी तरवारां री धारां सूं एकर तो खिलजी रा पग डगमग ग्या पण जैड़ो कै घण जीतै अर जोधार हारै वाल़ी सही होई।आखर में सीहड़देव रै महलां में जौहर री झाल़ां धधक उठी।सीहड़देव पराक्रम बताय आपरी आण सारु वीरगति रो वरण कियो-
सिहड़दे लड़ियो खिलजी सूं,
अवनी पर राखण जस झंडी।
प्राणां रै बदल़ै पणधारी ,
मरजाद सांखलै धर मंडी।।(इणनै ईज कैता रजपूती!गिरधर दान रतनू)
वीरगति पावण सूं पैला सीहड़देव सांखलां नै भोल़ावण दी कै जे असली हो! तो दधवाड़ियां सूं मत बदल़जो अर जिको सांखलो आंसूं बदल़ेला बो असली सांखलो नीं होवैला-
सीहड़ राणै अक्खियो,
आ धारा री धीज।
जो पलटै दधवाड़ियां,
जो सांखलां न बीज!!
गिरधर दान रतनू दासोड़ी
RAJASTHAN Gk
Most important texts of
RAJASTHAN
अभ्रक की मण्डी - भीलवाड़ा
आदिवासीयो का शहर - बाँसवाड़ा
अन्न का कटोरा - श्री गंगानगर
औजारो का शहर - नागौर
आइसलैण्ड अॉफ ग्लोरी - जयपुर
उध्यानो,बगीचो का शहर - कोटा
ऊन का घर - बीकानेर
ख्वाजा की नगरी - अजमेर
गलियो का शहर - जैसलमेर
गुलाबी नगरी - जयपुर
घंटियो का शहर - झालरापाटन
छोटी काशी - बुन्दी
जलमहलो की नगरी - डीग
झीलो की नगरी - उदयपुर
वस्त्र नगरी - भीलवाड़ा
देवताओं की उपनगरी - पुष्कर
नवाबो का शहर - टोंक
भारत का पेरिस - जयपुर
⛅पूर्व का वेनिस - उदयपुर
पहाड़ो की नगरी - डुंगरपुर
भक्ति व साधना की नगरी - मेड़तासिटी
मूर्तियो का खजाना - तिमनगढ़ , करौली
मरुस्थल की शोभा - रोहिड़ा
राजस्थान की मरुनगरी - बीकानेर
राजस्थान का ह्रदय - अजमेर
राजस्थान का प्रवेश द्धार - भरतपुर
राजस्थान का सिंह द्धार - अलवर
राजस्थान का अन्न भण्डार - गंगानगर
राजस्थान की स्वर्णनगरी - जैसलमेर
राजस्थान की शिक्षा की राजधानी - अजमेर
राजस्थान का कश्मीर - उदयपुर
राजस्थान का काउंटर मेग्नेट - अलवर
राजस्थान की मरुगंगा देश न्दिरा गाँधी नहर
पश्चिम राजस्थान की गंगा - लुणी नदी
राजस्थान की मोनालीसा - बणी ठणी
रेगिस्तान का सागवान - रोहिड़ा
राजस्थान का खजुराहो - भण्डदेवरा
राजस्थान का कानपुर - कोटा
राजस्थान का नागपुर - झालावाड़
राजस्थान का राजकोट - लुणकरणसर
राजस्थान का स्कॉटलैण्ड -अलवर
⚓राजस्थान की धातु नगरी - नागौर
राजस्थान का आधुनिक विकास तीर्थ - सूरतगढ़
राजस्थान का पँजाब - साँचौर
राजस्थान की अणुनगरी - रावतभाटा , बेगूँ
राजस्थान का हरिद्धार - मातृकुण्डिया , चित्तौड़गढ़
राजस्थान का अण्डमान - जैसलमेर
राजपुताना की कूँची - अजमेर
राजस्थान का मेनचेस्टर - भिवाड़ी
राजस्थान का जिब्राल्टर - तारागढ़ , अजमेर
राजस्थान का ताजमहल - जसवंतथड़ा , जोधपुर
राजस्थान का भुवनेश्वर - ओसियाँ
☁राजस्थान की साल्टसिटी - साँभर
राजस्थान की न्यायायिक राजधानी - जोधपुर
☔राजस्थान का चेरापूँजी - झालावाड़
राजस्थान की डल झील - माउण्ट आबू
राजस्थान का गौरव - चित्तौड़गढ़
ऐसो है मेरो .
राजस्थान